Tadbirni kirish so‘zi bilan O'zbekiston Respublikasi Prezidentining yoshlar, fan, ta'lim, sog‘liqni saqlash, madaniyat va sport masalalari bo‘yicha maslahatchisi Odil Abdurahmonov ochib berdi:

-  Tarbiyaga barcha - o'qituvchi, ota-ona va jamiyat birdek mas'uldir. Bu borada sabablarni to‘g‘ri bahololmaganimiz, amalga oshirilayotgan ishlardan natija ololmaganimiz tufayli hozirgi nuqtaga kelib qoldik. Jahonda ro‘y berayotgan o‘zgarishlar fonida ma'naviyat va tarbiya masalasi yanada muhimroq ahamiyat kasb etmoqda. Bizning kelajakka qo‘ygan rejalarimiz, intilayotgan marralarimiz juda katta. Bu yo'lda esa ma'nan barkamol, vatanparvar yoshlarga ehtiyojimiz bor. 

   Maktabgacha va maktab ta'limi vaziri Hilola Umarova:

- Bu seminar-treninglar yig'ilish emas, balki mulohazalar, takliflar uchun ochiq maydon tarzida o'tishini istardim. Biz ko'tarayotgan mavzu juda muhim, unda har biringizning taklifingiz soha rivojida alohida ahamiyat kasb etadi. Bugun maktablar uchun “Odob-axloq qoidalari"ning yangi tahririni birgalikda ko‘rib chiqamiz. Men sizlar tomoningizdan bildiriladigan barcha takliflarga ochiqman. Zero, o‘quvchilarimizni yurtimiz taraqqiyotiga xizmat qiluvchi yoshlar etib tarbiyalashda biz hammamiz bir jamoamiz, bitta kemadamiz. 

    Dilshod Kenjayev, Maktabgacha va maktab ta’limi vaziri o‘rinbosari: 

- Bugungi ta'lim jarayonini tarbiyadan alohida tasavvur etib bo‘lmaydi. Biz sizlar bilan sohaga oid muammolar va ularning yechimlarini ko'rib chiqish uchun yig'ilganmiz. Har bir taklif ustida alohida ishlaymiz. Bu esa yagona maqsad yo‘lida bitta jamoa bo‘lib ishlashga yordam beradi.