So‘nggi yillarda davlatimiz tomonidan O‘zbekistonning 2030-yilgacha xalqaro baholash dasturlarida uzluksiz ishtirok etishi hamda mazkur baholash mezoni bo‘yicha dunyoning ilg‘or mamlakatlari qatoriga kirishini ta’minlash bo‘yicha qator ishlar amalga oshirib kelmoqda.

    Mazkur vazifalar ijrosini ta’minlash maqsadida davlatimiz qator xalqaro ta’lim sifatini baholash tadqiqotlari va tadbirlarida ishtirok etib kelmoqda. Xalqaro PISA tadqiqotlari ana shunday muhim jarayonlardan biridir.

   Xalqaro PISA tadqiqotlari 15 yoshli o‘smirlarning savodxonligi, kreativ va mantiqiy fikrlash qobiliyati, maktabda olgan bilimlarini real hayotiy vaziyatlarda qo‘llay olishi, bir so‘z bilan aytganda mustaqil hayotga tayyorgarligi baholovchi jarayon hisoblanadi.

   PISA tadqiqotlari har bir mamlakatga o‘zining kuchli va zaif tomonlarini dunyo ta’lim tizimi bilan qiyoslash imkonini beradi.
    Bu orqali mamlakatdagi ta’lim tizimi, ta’limning tashkil etilishi, o‘quvchilarning tanqidiy va ijodiy fikrlashi, ota-onalarning farzandlarini ta’lim olishlariga e’tiborlari va uyda yaratilgan sharoitlari bo‘yicha atroflicha ilmiy asoslangan ma’lumotlar olishga erishish ko‘zda tutilgan.

   Mazkur tadqiqotda viloyatimizdan 3 ta, xususan, Navoiy shahridagi 1-, Navbahor tumanidagi 5-, 15-maktablari ishtirok etadi.

   Jarayonlarni yuqori saviyada tashkil etish maqsadida Maktabgacha va maktab ta’limi vazirligi, A. Avloniy nomidagi Pedagoglarni kasbiy rivojlantirish va yangi metodikalarga o‘rgatish milliy-tadqiqot instituti, Ta’limni rivojlantirish ilmiy-metodik markazi, viloyat Maktabgacha va maktab ta’limi boshqarmasi mas’ul xodimlaridan iborat ishchi guruh tuzildi.

Navoiy viloyati Maktabgacha va maktab ta’limi boshqarmasi matbuot xizmati.