NAVOIYDA “PREZIDENT ARCHASI” TANTANALARI BO‘LIB O‘TDI

Yangi yil - Yangi orzular! Ushbu bayram har bir dilda o‘zgacha intiqlik bilan kutiladi. Bugun bolajonlarning quvonchi bir olam. “Prezident archasi” bayram tantanalari Navoiy viloyatida yuqori kayfiyatda o‘tkazildi.

Bayramda oilaviy bolalar uylari tarbiyalanuvchilari, ota-ona qaramog‘idan marhum bo‘lgan bolalar, yurt tinchligi yo‘lida qurbon bo‘lgan huquqni muhofaza qiluvchi organlar xodimlarining farzandlari qatnashdi.

Tadbirda viloyat hokimi Normat Tursunov, sektor rahbarlari, viloyat Maktabgacha va maktab ta’limi boshqarmasi, hamkor tashkilotlar hamda nuroniylar ishtirok etishdi.

Tadbirda so‘z olganlar, bolajonlarni Yangi yil bayrami bilan samimiy tabrikladi. Shundan so‘ng, bolajonlarga 12 nomdagi o‘quv qurollari, 15 nomdagi shirinliklar hamda samokatdan iborat bo‘lgan “Prezident sovg‘asi” tantanali o‘z egalariga topshirildi.

Bayramning teatrlashgan sahna ko‘rinishlari, Qorbobo, Qorqiz va ertak qahramonlari ishtirokidagi bayram tomoshalari ishtirokchilarga bir olam quvonch ulashdi.

Navoiy viloyati Maktabgacha va maktab ta'limi boshqarmasi matbuot xizmati.