Bugun Karmana tumanidagi 30-umumiy o‘rta ta’lim maktabida O‘zbekiston Jurnalistlar uyushmasi Navoiy viloyat bo‘limi raisi O.Aslonov, “Do‘stlik bayrog‘i” va “Znamya drujbi” gazetasi tahririyati bosh muharriri B.Umarov va jurnalist Sh.Asoyeva bilan ijodiy uchrashuv tashkil etildi. 

Uchrashuvda ta’lim dargohida tahsil olayotgan o‘quvchi-yoshlar bilan suhbatlashilib, Yangi O‘zbekistonda yoshlarga qanot bo‘luvchi imkoniyatlar, shuningdek, yaratilgan sharoitlar haqida to‘xtalib o‘tildi. O.Aslonovning rahbarlikka qadar olib borgan faoliyati, qilayotgan mehnati sabab erishayotgan yutuqlari bilan tanishtirilgan bo‘lsa, shoir Boboqand Mirzodan ijodiy parchalar tinglandi. 

Tadbir doirasida viloyat Maktabgacha va maktab ta’limi boshqarmasi boshlig‘i o‘rinbosari Z.Niyazov hamda jurnalist Sh.Asoyeva o‘rtasida memorandum imzolandi. 

Memorandumdan ko‘zlangan maqsad – ta’limda yaponcha uslubni Navoiy tajribasi asosida qo‘llab ko‘rish, 2025-yil davomida mazkur ta’lim maskan faoliyatini qo‘llab-quvvatlash, maktab o‘quvchilarini ma’nan yetuk va ruhan sog‘lom bo‘lib tarbiyalanishlariga hissa qo‘shish, shu qatorda, ta’lim yo‘nalishida belgilangan rejaviy tadbirlarga hamkorlik qilish va qo‘shimcha tadbirlar tashkil etish hamda OAV orqali yoritish barobarida, o‘quvchi-yoshlarning daxldorligini ta’minlash ko‘zda tutilgan. Shuningdek, memorandum doirasida maktabda yangi loyihalar yo‘lga qo‘yiladi hamda viloyatning barcha tashkilotlari bunda jalb etiladi.

Navoiy viloyati Maktabgacha va maktab ta’limi boshqarmasi matbuot xizmati