Yangiliklar
RASMIY MUNOSABAT
6-may 2023-yil
Navoiy viloyati Maktabgacha va maktab ta’limi boshqarmasi, joriy yilning 6- may kuni ayrim ijtimoiy tarmoqlarda e’lon qilingan “Navoiy viloyatida yana bir bolakay bog‘cha tarbiyachisi tomonidan kaltaklangani iddao qilinayotgan murojaat keldi. Yana xususiy bog‘chalarning birida bo‘lgani aytilmoqda” sarlavhali video va fotolavha yuzasidan quyidagilarni ma’lum qiladi.
Mazkur holat viloyat Maktabgacha va maktab ta’limi boshqarmasi tomonidan tezkorlik bilan atroflicha o‘rganib chiqildi.
Ushbu holat 2023-yilning 4-may kuni Karmana tumani “Kumushkon” MFYdagi yakka tartibdagi tadbirkor Shoxijahon Saidov rahbarligidagi oilaviy nodavlat maktabgacha ta’lim tashkilotiga tegishli ekanligi aniqlandi. Dastlabki aniqlangan ma’lumotlarga ko‘ra, tarbiyalanuvchiga qilingan bunday qo‘pol hatti-harakat shu bog‘chaning tarbiyachi yordamchisi S.Yu tomonidan sodir etilganligi ma’lum bo‘ldi.
Joriy yilning 8-may kuni mazkur xodimga nisbatan qonunchilikda belgilangan tartibda tegishli qaror qabul qilish masalasi ish beruvchi tomonidan ko‘rib chiqiladi hamda Karmana tumani Maktabgacha va maktab ta’limi bo‘limi tomonidan vakolati doirasida ko‘rib chiqishlik va tegishli qaror qabul qilishlik uchun tuman Prokuraturasi va Ichki ishlar bo‘limiga belgilangan tartibda xat yuborilishi ta’minlanadi.
Natijasi bo‘yicha qo‘shimcha axborot taqdim etiladi.
Viloyat Maktabgacha va maktab ta’limi boshqarmasi ta’lim tashkilotlarida sodir etilayotgan turli holatlarga befarq bo‘lmagan ota-onalar hamda jamoatchilik vakillariga o‘z minnatdorchiligini bildiradi va kelgusida ham doimiy hamkorlik ishlarini olib borishga tayyor.
Navoiy viloyati Maktabgacha va maktab ta’limi boshqarmasi matbuot xizmati.
